Azərbaycan Respublikasının Milli Arxiv İdarəsi tərəfindən təsdiq olunmuş Dövlət Arxivinin 2024-cü ilin İş Planına uyğun olaraq, 8 Noyabr – Zəfər Günü münasibətilə Dövlət Arxivində məşhur artilleriya generalı, Azərbaycan Xalq Cümhuriyyətinin hərb naziri Səməd bəy Mehmandarov haqqında kitabın müəllifi, tədqiqatçı-jurnalist Vasif Quliyevlə görüş keçirilib.

Görüşdə “Mehmandarovlar” kitabının müəllifi, tədqiqatçı-jurnalist Vasif Quliyev, əməkdar jurnalist Elşən Əliyev, xalq artisti Eldost Bayram, Dövlət Arxivinin direktor müavini Səyyarə Hacıyevanın rəhbərliyi ilə arxivin kollektivi, o cümlədən Bakı Dövlət Universitetinin Tarix fakültəsinin tələbələri iştirak edirdilər.

Arxivin direktor müavini Səyyarə Hacıyeva çıxış edərək görkəmli hərbçi Səməd bəy Mehmandarovun həyat və fəaliyyəti haqqında məlumat verib.

“Mehmandarovlar” kitabının müəllifi Vasif Quliyev apardığı arxiv araşdırmaları haqqında danışıb.

Əməkdar jurnalist Elşən Əliyev kitabın əhəmiyyəti və onun gənc nəslin vətənpərvərlik ruhunda tərbiyəsi işində oynadığı roldan bəhs edib.

Xalq artisti Eldost Bayram kitabdan parçalar səsləndirib.

Tədbir iştirakçılarına Vasif Quliyevin Azərbaycan və ingilis dillərində nəşr olunmuş “Şuşa qalası” broşürlər seriyası hədiyyə edilib.