Ailə, Qadın və Uşaq Problemləri üzrə Dövlət Komitəsi və Avropa İttifaqının birgə təşkilatçılığı ilə “Aİ Gender Bərabərliyi naminə: İslahat üzrə Yardım Xidməti” layihəsi çərçivəsində gender məsələləri üzrə məsul şəxslər üçün “Gender Bərabərliyi və İdarəetmə” mövzusunda təlim keçirilmişdir.

         25 oktyabr 2022-ci tarixindən start götürən üç günlük təlimdə "Gender (kişi, qadın) bərabərliyinin təminatları haqqında" Qanunun tətbiqi, Ailə, Qadın və Uşaq Problemləri üzrə dövlət Komitəsinin Milli Məclis qarşısında hesabatlılığı, həmçinin gender məsələləri ilə bağlı vəziyyəti təhlil etmək üçün dövlət qurumlarında gender məsələləri üzrə məsul şəxslər təyin edilməsinin mövcud vəziyyəti müzakirə edilmişdir. Gender məsələləri üzrə məsul şəxslərlə keçirilən seminarın gələcəkdə gender məsələləri ilə bağlı daha dolğun məlumatların alınmasına töhfə vermək məqsədini daşıdığı qeyd olunmuşdur.

        Sözügedən tədbirdə Azərbaycan Respublikasının Milli Arxiv İdarəsini Təşkilat-metodika və beynəlxalq əlaqələr şöbəsinin Beynəlxalq əlaqələr sektorunun müdiri Günel Ağayarova təmsil etmişdir.

         Təlimdə “Gender bərabərliyi konsepsiyası və anlayışı”, “Gender bərabərsizliyinin səbəbləri və nəticələri”, “Gender indikatorları və yoxlama alətləri” və digər mövzular üzrə ətraflı məlumatlar əldə olunmuşdur.