Azərbaycan Respublikasının Milli Arxiv İdarəsi tərəfindən təsdiq olunmuş Dövlət Arxivinin Gəncə filialının 2025-ci ilin İş Planına uyğun olaraq, Samux rayonu, Qarayeri qəsəbəsi 2 nömrəli tam orta məktəbin şagirdlərinin Dövlət Arxivinin Gəncə filialına ekskursiyası təşkil olunub.

Adıçəkilən məktəbin direktor müavini Nurlana Səmədzadənin rəhbərliyi ilə ekskursiyada iştirak edən şagirdlərə filialın direktoru Eleonora Süleymanova tərəfindən filialın fəaliyyəti, sənədlərin mühafizə şəraiti haqqında ətraflı məlumat verildi. Filialın əməkdaşları tərəfindən şagirdlər mühafizəxanalar və onların iş rejimi ilə əyani qaydada tanış edildilər. 

E. Süleymanova “20 Yanvar” faciəsi haqqında şagirdlərə məlumat verdi. Bildirildi ki, yalın əllə sovet tanklarının qarşısına çıxan xalqımızın igid oğul və qızları azadlığımızın və müstəqilliyimizin ilkin qaranquşları oldular. Xalq olaraq həmin dövrdən başladığımız azadlıq, müstəqillik və suverenlik uğrunda mübarizəmiz Müzəffər Ali Baş Komandan İlham Əliyevin rəhbərliyi ilə Şanlı Ordumuz tərəfindən 44 günlük Vətən Müharibəsi və Antiterror əməliyatı ilə məntiqi sonluğa çatdı.

Daha sonra şagirdlər filialda daimi saxlanılan Vətən Müharibəsi Şəhidlərinin şəxsi mənşəli fondlarında mühafizə edilən sənədlərə baxış keçirdilər.