Milli Arxiv İdarəsinin rəisi Əsgər Rəsulov ölkəmizdə səfərdə olan Rusiya Federasiyasının Prezidenti yanında Rusiya Xalq Təsərrüfatı və Dövlət Qulluğu Akademiyasının direktor müavini İlya Jeninin rəhbərlik etdiyi nümayəndə heyəti ilə görüşüb. 

Əsgər Rəsulov Rusiya Federasiyası ilə Azərbaycan Respublikası arasında siyasi, iqtisadi, sosial və mədəni əlaqələrin dinamik inkişaf etdiyini bildirərək, arxiv işi sahəsində mövcud ikitərəfli əlaqələrin və əməkdaşlığın da müvafiq surətdə genişləndiyini bildirdi.

İlya Jenin də öz növbəsində səmimi qəbula görə Əsgər Rəsulova nümayəndə heyəti adından minnətdarlığını bildirərək iki ölkə arasında elm və təhsil sahəsində əlaqələrin durmadan inkişaf etdiyini vurğuladı. Təmsil etdiyi ali təhsil müəssisəsi adından bu cür əlaqələrin arxiv işi sahəsini də əhatə etməsini yüksək qiymətləndirdi.

Daha sonra nümayəndə heyəti İdarənin tabeliyində fəaliyyət göstərən Dövlət Arxivində, Dövlət Tarix Arxivində, Dövlət Kino-Foto Sənədləri Arxivində sənədlərin saxlanılması şəraiti, mühafizəxanaların iş rejimi ilə tanış oldular, həmçinin Rusiya İmperiyasının XIX əsrin sonu XX əsrin əvvəllərinə aid, o cümlədən sovet dövrünə dair bir sıra sənədlərə baxış keçirdilər.