Geniş erudisiyalı və hərtərəfli biliyə malik olan professorTağı  Tağızadə  dövrünün  tanınmış alimlərindən olmuş,Azərbaycanda səhiyyə xidmətinin inkişafında  əhəmiyyətli rol oynamış, gənc tibbi kadrların yetişməsində bilik və bacarığını  əsirgəməmişdir.

Tağı Ələkbər oğlu Tağızadə4 sentyabr 1923-cü ildə Bakı şəhərində anadan olmuşdur.1938-ci ildə Bakı şəhəri,Oktyabr rayonundakı  25№-li orta məktəbi bitirmiş,elə həmin ildə Azərbaycan Tibb İnstitutunun müalicə profilaktika fakültəsinə qəbul olunmuşdur.1942-ci ildə institutu fərqlənmə diplomu ilə bitirdikdən sonraAzərbaycan SSR Xalq Səhiyyə Komissarlığının Epidemiologiya və Mikrobiologiya Elmi Tədqiqat İnstitutunda işə başlamış,1945-ci ilədək Kəlbəcər, Yevlax və Quba rayonlarında həkim-epidemioloq, rayon səhiyyə şöbəsinin müdiri,sanitariya və epidemiologiya stansiyasının rəisi,tropik  stansiyasının rəisi və s.vəzifələrdə çalışmışdır.

1945-ci ilin dekabrında Xalq Səhiyyə Komissarının əmri ilə  Azərbaycan  Tibb İnstitutuna,epidemiologiya kafedrasına asissent təyin olunur. 1952-ci ildə namizədlik dissertasiyasını müdafiə etmiş,tibb elmləri namizədi adını almışdır. Kafedranın  dosenti  olan Tağı Tağızadə 1962-ci ildə  S.M.Kirov adına Parazitologiya və Tropik Tibbi  Elmi  Tədqiqat İnstitutuna direktor təyin edilir.Burada 1964-cü ildə  doktorluq dissertasiyası müdafiə etmiş, 1965-ci ildə professor elmi adını qazanmışdır.

1966-ci ildə müsabiqə yolu ilə Azərbaycan Tibb İnstitutunun Epidemiologiya kafedrasının müdiri seçilmiş,ömrünün sonunadək burada işləmişdir. 1981-ci ilin  aprelində yenidən Parazitologiya və Tropik  Tibbi Elmi Tədqiqat İnstitutuna  direktor  təyin edilsə də, Tibb İnstitutunda kafedra müdiri vəzifəsində ictimai  əsaslarla fəaliyyətini davam etdirmişdir.25 yanvar 1988-ci ildə Azərbaycan SSR Səhiyyə nazirinin əmri ilə T.Tağızadə  Peşəkar Xəstəliklər Elmi-Tədqiqat İnstitutuna direktor  təyin edilmişdir.

Tağı Tağızadə fəaliyyəti dövründə həm də Səhiyyə Nazirliyinin 2№-li Baza Tibb Texnikumunda (1946-1956) və Azərbaycan Tibb İnstitutunun müalicə-profilaktika  fakültəsində dekan müavini (1956-1960),ATİ-nin Sanitariya və gigieyna fakültəsində dekan (1966-1968), Azərbaycan SSR Səhiyyə Nazirliyinin baş epidemioloqu (1968-1975), Azərbaycan SSR Səhiyyə Nazirliyinin parazitologiya üzrə baş mütəxəssisi (1984) işləmişdir.

Professor T.Ə.Tağızadə öz elmi-pedaqoji fəaliyyəti ərzində infeksion və parazitar xəstəliklərin öyrənilməsi və onlarla mübarizənin təşkili sahəsində elm və praktikanı qiymətli məlumatlarla zənginləşdirən çoxsaylı tədqiqat işləri aparmışdır.Tədqiqatları, əsasən, leptospiroz, malyariya, helmintozlar və salmonelyoz xəstəliklərinin epidemiologiyasına həsr olunmuşdur. O, SSRİ-də ilk dəfə olaraq favizm xəstəliyiniaşkar etmişdir. 1 dərslik, 4 monoqrafiya, 7 dərs vəsaiti, 18 elmi-kütləvi kitabça, 300-ə qədər elmi məqalə nəşr etdirmişdir.

 T.Ə.Tağızadə uzun illər pedaqoji fəaliyyəti ilə yanaşı, elmi kadrların hazırlanmasına da ciddi diqqət yetirmişdir.Onun rəhbərliyi ilə 11 doktorluq və 26 namizədlik dissertasiyası müdafiə olunmuşdur.

Tibb  elmi sahəsindəki xidmətlərinə görə professor Tağı Tağızadə “Şərəf Nişanı”  ordeni, akademik K.İ.Skryabinin 100 illiyi,V.İ.Leninin 100 illiyi yubiley medalları, müxtəlif fəxri fərmanlarlatəltif edilmişdir.Tağı Tağızadə Azərbaycan SSR-in Əməkdar elm xadimi,bir sıra keçmiş İttifaq ölkələrinin səhiyyə təşkilatlarının fəxri üzvü olmuşdur.

Tağı Tağızadə 25 noyabr 1998-ci ildə  Bakı şəhərində vəfat etmişdir.

Məqalənin hazırlanmasında ARDETSA-da Tağı Ələkbər oğlu Tağızadəyə aid qorunub saxlanılan 134 №-li fonddan istifadə edilmişdir.

Zinyət Vəliyeva

Dövlət Elm və Texnika

Sənədləri Arxivinin aparıcı arxeoqrafı