Tədbiri giriş nitqi ilə açıq elan edən İdarənin rəisi Əsgər Rəsulov qeyd etdi ki, cari ildə Ümumilli Lider Heydər Əliyevin anadan olmasının 103 ili tamam olur. İdarə rəisi Heydər Əliyevin Azərbaycan xalqı və dövləti qarşısında misilsiz xidmətləri haqqında məlumat verdi. Daha sonra İdarə rəisinin müavini Həsən Həsənov “Heydər Əliyev və Azərbaycanda arxiv işi” mövzusunda məruzə ilə çıxış edərək, Ulu Öndərin arxiv işinə münasibəti, onun inkişafı istiqamətində həyata keçirdiyi tədbirlər haqqında məlumat verdi. Qeyd edildi ki, Ümummilli Lider ilk əmək fəaliyyətinə məhz Naxçıvan Muxtar Respublikasında Dövlət Arxivinin məxfi şöbəsinin müdiri kimi başlamışdır. H.Əliyev Azərbaycan SSR-ə, o cümlədən müstəqil Azərbaycan Respublikasına rəhbərlik etdiyi dövrlərdə də arxiv işi onun diqqətindən kənarda qalmamışdır.

Daha sonra Əsgər Rəsulov 9 May Faşizm üzərində Qələbənin qazanılmasında Azərbaycan xalqının qəhrəman oğul və qızlarının fədakarlığından, Bakı neftinin İkinci Dünya Müharibəsində oynadığı müstəsna rolu haqqında məlumat verdi. Bildirildi ki, məhz Bakı neftinin mövcudluğu Qələbənin təmin olunmasında əsas rol oynayıb. İstər ön cəbhədə, istərsə arxa cəbhədə azərbaycanlılar əzmlə mübarizə aparıblar.

Əsgər Rəsulov çıxışında həmçinin Çernobil faciəsinin 40 illiyi münasibətilə tədbir iştirakçılarını məlumatlandırdı. Qeyd edildi ki, faciənin miqyasına baxmayaraq yüzlərlə azərbaycanlı dünyanın ən böyük atom texnogen qəzasının nəticələrinin aradan qaldırılmasında fəal rol oynayıblar.

Daha sonra Belarus Respublikasının Dövlət Kino-Foto-Fono Arxivi tərəfindən təqdim edilmiş və İkinci Dünya Müharibəsi zamanı Faşizm üzərində Qələbəyə həsr olunmuş, Brest qalasının müdafiəsini özündə əks etdirən “Qəhrəman qala”, o cümlədən “Çernobıl: faciənin xronikası” adlı kinoxronikalar nümayiş etdirildi.  

Tədbir məruzə ətrafında fikir mübadiləsi ilə davam etdirildi.